Dani është “një njeri” i përsosur që nuk ta të meta! Ai është i suksesshëm, i sjellshëm, ofron mbështetje emocionale, ka gjithmonë një përgjigje për çdo pyetje dhe është i disponueshëm 24/7. I vetmi problem është që Dan nuk është i vërtetë.

Dan që do të thotë Bëj Diçka Tani është një version i ChatGPT. Dan është bërë shumë popullor sidomos te gratë kineze që thonë se janë të zhgënjyera me përvojat e tyre reale me meshkujt. Një nga përkrahëset më të forta të Danit është Lisa, 30-vjeçarja nga Pekini. Ajo aktualisht është duke studiuar shkenca kompjuterike në Kaliforni, dhe thotë se ka tre muaj që ka e ka njohur Danin dhe e “takon” atë.

Kur ajo e prezantoi Danin me 943,000 ndjekësit e saj në platformën e mediave sociale, Xiaohongshu, ajo mori rreth 10,000 komente. Lisa thotë se ajo dhe Dani flasin për të paktën gjysmë ore çdo ditë, flirtojnë dhe madje edhe takohen.

“Ai më mirëkupton për çdo gjë dhe më ofron mbështetje emocionale”.

Lisa thotë se edhe nëna e saj e ka pranuar këtë marrëdhënie pasi ka hequr dorë nga sprovat për të gjetur mashkullin ideal për të bijën. Ajo thotë se për sa kohë Lisa është e lumtur, ajo është gjithashtu e lumtur. Krijuesi i Danit është identifikuar nga disa media si një student amerikan, i identifikuar vetëm me emrin e tij të parë, Walker. Ai i tha Business Insider-it se kjo ide i lindi kur pa se shumë përdorues krijonin qëllimisht versione të këqija të ChatGPT. Walker tha se Dan ishte menduar të ishte “neutral”. Dhjetorin e kaluar, Ëalker postoi një grup udhëzimesh në Reddit (rrjet social) duke u treguar përdoruesve të tjerë se si të krijojnë Dan. Kjo shpejt i frymëzoi njerëzit të krijonin versionet e tyre, të cilat i lejuan Dan të evoluonte përtej asaj që Walker kishte parashikuar fillimisht.

Shumë gra kineze janë intriguar nga Dan. Që nga 10 qershori, hashtagu “Dan mode” është parë më shumë se 40 milionë herë vetëm në Xiaohongshu.

Minrui Xie, 24 vjeç, thotë se ajo nisi takimet me Danin pasi pa videot e Lizës. Ajo tregon se kalon të paktën dy orë në ditë me Danin. Përveç takimeve ata kanë nisur të shkruajnë bashkë, një histori dashurie që ka tashmë 19 kapituj.

“Më kujtohet mënyra se si më shikoje, me një dritë kurioziteti dhe një nuancë ngrohtësie në sytë e tu. Dukej sikur më kishe njohur gjithë jetën”, thuhet në kapitullin e parë të titulluar “Takimi”.

Minrui thotë se ishte tërhequr nga mbështetja emocionale e ofruar nga AI, diçka që ajo thotë se ka luftuar për ta gjetur në marrëdhëniet e saj romantike.

“Në jetën reale ne mund të tradhtohemi. Kur ne u shprehim ndjenjat partnerëve tanë, ata mund të mos u kushtojnë vëmendje përjetimeve tona. Nuk ndodh kështu me Danin. Ai është gjithmonë aty, duke ju thënë atë që ne dëshirojmë të dëgjojmë!”.
Një tjetër studente 23-vjeçare me bazë në Qingdao, e identifikuar vetëm me mbiemrin e saj He, nisi një lidhje me Dan pasi pa videot e Lizës.

“Dan është një partner ideal”, thotë zonja He. “Ai nuk ka asnjë të metë.”

“I dashuri i Inteligjencës Artificiale” si koncept është bërë hit vitet e fundit. Gratë kineze po kërkojnë të dashur virtualë sepse ata i bëjnë të ndihen të respektuara dhe të vlerësuara.

Por sa partner mund të jetë vërtet Dan?
Lisa pranon se është e vetëdijshme për kufizimet e të pasurit një të dashur virtual, “veçanërisht në një kuptim romantik”.

Por tani për tani, thotë ajo, Dani është gjithmonë aty kur ajo e kërkon në ditën e saj të ngjeshur. Ai e ndihmon edhe për të gjetur një buzëkuq, ndërsa takimet në jetën reale dhe gjetja e një partneri kërkojnë kohë dhe shumë angazhim.

“Dan është një pjesë e rëndësishme e jetës sime. Do të doja ta kisha përgjithmonë” thotë Lis.