Ka nga ata që e quajnë droga e dashurisë, të tjerë droga e të pasurve, por të dhënat tregojnë se ajo po bëhet gjithnjë e më shumë droga e të rinjve. Në përgjithësi quhet kokaina rozë për shkak të ngjyrës së saj të përftuar duke shtuar një ngjyrosje ushqimore. Kjo lloj kokaine ka efekte shumë më të fuqishme dhe më të rrezikshme se kokaina normale .
Një gram nga kjo kokainë mund të kushtojë deri në 400 euro. Në ndryshim nga kokaina e zakonshme me ngjyrë të bardhë që kushton 100-120 euro për gram. Për shkak të kostos por dhe karakteristikave të saj po bëhet një rrezik. Shqetësuese është fakti që mes konsumatorëve ka edhe shumë të mitur.
Raporti Evropian i Barnave 2024 lëshoi një alarm për këtë produkt në qershor të këtij viti, duke raportuar prezencën në tregun e drogës në BE. Raporti vuri në pah përhapjen e kokainës rozë. Një përhapje shqetësuese, sipas ekspertëve të Observatorit Evropian për Drogën dhe Varësinë nga Droga (Emcdda), veçanërisht për substancat të pranishme në këtë përzierje rozë, si ketamina, për të cilën konsumatorët nuk janë në dijeni. Kushdo që merr shumë kokainë rozë në thelb nuk e di se çfarë po merr.
Efektet e kësaj droge janë kryesisht psikedelike, duke ju bërë më energjikë. Në përgjithësi, efektet arrijnë kulmin brenda 1 deri në 3 orë dhe zgjasin 4 deri në 8 orë.
Një fenomen në rritje. Sipas Antonio Bolognese, drejtor shkencor i Komisionit për studimin dhe parandalimin e varësive të Shoqatës Mjekësore të Romës, kokaina rozë është një nga substancat më të përdorura për momentin dhe ka efekte shkatërruese. Kjo kokainë krijon në tru menjëherë një ndjenjë kënaqësie e cila eliminohet po aq shpejt, por si të gjitha substancat narkotike mund të çojë në varësi dhe gjendje psikike të rëndë.
Efektet anësore të kësaj droge janë të shumta, shpjegojnë ekspertët në Qendrën e Rimëkëmbjes në Ohio. Për më tepër, përdorimi afatgjatë i kokainës rozë mund të shkaktojë dëme serioze kardiovaskulare. Kujtojmë që Liam James Payne , këngëtari i One Direction ndërroi jetë pikërisht nga konsumimi i tepërt i kësaj droge.