Hidranti në Los Angeles janë tharë ndërsa zjarrfikësit po luftojnë me zjarret shkatërruese, dhe Lynda dhe Stewart Resnick, koleksionistë arti dhe miliarderë, po përballen me kritika për zakonet e tyre të përdorimit të ujit dhe për depozitat private të ujit. Megjithatë, shumë ekspertë konsiderojnë se këto kritika janë të pabaza.
Resnickët janë pronarë të Wonderful Company, një konglomerat që ka një vlerë prej deri në gjashtë miliardë dollarë. Me një pasuri totale prej 13 miliardë dollarësh, ata janë familja më e pasur bujqësore në Kaliforni. Ata zotërojnë rreth 185 mijë hektarë tokë dhe kontrollojnë shumicën e aksioneve në Kern Water Bank, një rezervuar uji mbi 20 mijë hektarë në Luginën San Joaquin, afërsisht dy orë në veri të Los Angeles.
Përveçse janë të njohur për ndërtimin e perandorisë së tyre bujqësore, Resnickët janë mbështetës të artit. Ata grumbullojnë vepra të artistëve të njohur evropianë dhe kanë disa punime të Picassos, Jean-Honore Fragonard dhe François Boucher në shtëpinë e tyre në Beverly Hills. Artnews i ka renditur mes 200 koleksionistëve më të mëdhenj të artit. Po ashtu, ata kanë dhuruar rreth 30 milionë dollarë për Muzeun Hammer dhe 90 milionë dollarë për Muzeun e Artit të Qarkut Los Angeles (LACMA). Pavilioni i Ekspozitës Resnick në LACMA, i hapur në vitin 2010 dhe i projektuar nga arkitekti i famshëm Renzo Piano, është një nga hapësirat muzeale më të mëdha dhe të ndriçuara natyrshëm në botë.
Resnickët janë gjithashtu donatorë të mëdhenj për qëllime ekologjike, siç ishte dhurimi prej 750 milionë dollarësh për Caltech në vitin 2019 për kërkime klimaterike. Megjithatë, ata janë kritikuar shpesh për praktikat e tyre bujqësore dhe përdorimin e madh të ujit. Një hetim i vitit 2016 nga Mother Jones zbuloi se Wonderful Company përdor më shumë ujë se çdo kompani tjetër në Kaliforni. Resnickët fituan 57 për qind të aksioneve në Kern Water Bank në vitin 1994, kur ky rezervuar uji publik ishte në prag të mbylljes, dhe që nga ajo kohë kanë siguruar një furnizim të konsiderueshëm me ujë për të vaditur 130 mijë hektarë tokë bujqësore.
Kritikët dhe aktivistët pretendojnë se negociatat e çiftit me autoritetet shtetërore ishin të fshehta dhe se ky kontroll i madh mbi ujë është i padrejtë. Protesta publike janë shtuar vitet e fundit, veçanërisht pas zjarreve shkatërruese të javës së kaluar në Los Angeles, që e shteruan sistemin e hidranteve të zjarrfikësve. Disa kritikë kanë sugjeruar se Resnickët kanë një ndikim të tepruar në përdorimin e ujit dhe që mund të kenë përfituar nga politikat dhe marrëveshjet sekrete. Wonderful Company ka deklaruar për revistën Fortune se kritikat janë të pavërteta dhe të bazuara në dezinformata. Ai theksoi se Wonderful Company nuk kontrollon shumicën e ujit në Kaliforni dhe se uji për përdorim komunal nuk përdoret për qëllime bujqësore. Sipas tij, kompania përdor më pak se një përqind të ujit në Kaliforni dhe prodhon më shumë se një çerek të ushqimit në shtet.
Në fakt, Los Angeles merr ujë nga një rrjet prej 114 rezervuarësh, përfshirë Kern, dhe të gjithë këta janë plotësisht të mbushur para shpërthimit të zjarreve. Sipas ekspertëve, uji nga rezervuari Kern nuk mund të ishte përdorur për zjarret për shkak të distancës dhe terrenit të vështirë që ndan rezervuarin nga Los Angeles. Për më tepër, sistemi i shpërndarjes së ujit në Los Angeles nuk është projektuar për të përballuar zjarret masive që godasin zona të banuara.