CIA dha dje një vlerësim të ri për origjinën e epidemisë së koronavirusit, duke thënë se virusi ka më shumë gjasa të ketë dalë nga një laborator kinez dhe jo nga kafshët.

“Ne vlerësojmë, megjithëse me besim të ulët, se pandemia Covid-19 ka origjinë laboratorike, më shumë sesa origjinë natyrore, bazuar në vëllimin e raporteve të disponueshme.”, tha një zëdhënës i CIA-s në një deklaratë për NBC News.
Vendimi për të bërë publik skenarin në fjalë është një nga të parët që ka marrë drejtori i ri i CIA-s, John Ratcliffe, i cili u emërua nga Donald Trump dhe mori detyrën të enjten.

Ratcliffe, i cili shërbeu si drejtor i inteligjencës kombëtare gjatë mandatit të parë të Presidentit Trump, ka argumentuar se Covid ka dalë nga Instituti i Virologjisë në Wuhan. Instituti është 40 minuta me makinë nga tregu Huanan, ku u shfaqën rastet e para.
Hipoteza e daljes së virusit nga laboratori është kundërshtuar fort nga shkencëtarët, duke përfshirë shumë që thonë se nuk ka prova thelbësore për ta mbështetur atë. Dhe Kina e ka hedhur poshtë më parë pretendimin, duke e cilësuar si “manipulim politik” nga Uashingtoni.

Megjithatë, teoria dikur e diskutueshme po fiton terren në mesin e disa agjencive të inteligjencës. Në vitin 2023, drejtori i FBI-së, Christopher Wray tha për Fox News se “origjina e pandemisë ka shumë të ngjarë të jetë një incident i mundshëm laboratorik”.