Një libër i ri mbi jetën e monarkisë britanike, me titull “Power and the Palace”, ka bërë publike një rrëfim personal të Mbretëreshës Camilla, e cila si adoleshente u bë viktimë e një tentative sulmi seksual, por arriti të mbrohej duke përdorur takën e këpucës kundër agresorit.

Sipas autorit Valentine Low, ish-korrespondent i The Times për çështjet mbretërore, rrëfimi iu tregua Boris Johnson-it rreth vitit 2008, kur ai shërbente si kryetar i bashkisë së Londrës. Ish-drejtori i komunikimit të Johnson, Guto Harri, kujtoi takimin në Clarence House, duke thënë se biseda ishte e ngrohtë, por në një moment u kthye në një kujtim tronditës.

“Camilla tha se ishte në tren për në Paddington, rreth moshës 16–17 vjeç, kur një djalë tentoi ta prekte në mënyrë të papërshtatshme. Ajo veproi menjëherë, duke hequr këpucën dhe e goditi në testikuj me takë, siç e kishte këshilluar nëna e saj,” tregoi Harri.

Pas mbërritjes në stacionin Paddington, Camilla gjeti një roje dhe raportoi incidentin, çka çoi në arrestimin e sulmuesit.

Mbretëresha, sot 78 vjeçe, është e njohur për angazhimin e saj kundër dhunës në familje dhe abuzimit seksual. Ajo ka mbështetur vazhdimisht viktimat përmes projekteve bamirëse, ndër të cilat spikat nisma për paketat ndihmëse të dedikuara grave të prekura nga dhuna seksuale.