Të lodhur nga njoftimet pa fund, nga “doomscrolling”-u dhe lodhja dixhitale, shumë njerëz po i kthehen asaj që quhet “lëvizja kundër telefonëve inteligjentë”. Ata po preferojnë të përdorin telefona minimalistë, të njohur si “dumbphones” – pajisje që shërbejnë vetëm për gjërat bazë, si telefonata, mesazhe, orë dhe orientim, por pa rrjete sociale, email apo internet.

Ky trend po përhapet me shpejtësi në mbarë botën, duke treguar një ndryshim të madh kulturor në mënyrën si njerëzit po zgjedhin të lidhen me teknologjinë.

Mesatarisht, një person kalon mbi 6 orë e gjysmë në ditë para ekranit. Për ta ulur këtë varësi, shumë zgjedhin modele si Light Phone II, të cilat ndihmojnë që koha para ekranit të bjerë nga pesë orë në rreth tre orë në ditë. Kjo do të thotë gati 14 orë më shumë çdo javë për jetën reale, krijimtari apo thjesht qetësi.

Për shumë njerëz, këta telefona nuk janë thjesht një pajisje, por një mënyrë jetese – një mënyrë për t’u rikthyer te vetja dhe te prania e vërtetë, në një botë që po bëhet çdo ditë e më shumë e lidhur virtualisht.