Pas 25 viteve në skenën e “Këngës Magjike” dhe 18 viteve në “E Diela Shqiptare”, Ardit Gjebrea është rikthyer më në fund me një këngë të re, pas një pauze 7-vjeçare në muzikë. Ky rikthim erdhi pikërisht në natën finale të festivalit, duke shënuar një moment të veçantë për artistin dhe publikun. Merita për këtë kthim, siç rrëfen vetë Arditi, i takon vajzës së tij, Annës.

Ishte një kompozim i saj që e bëri të reflektojë dhe t’i kërkojë që këngën, të cilën ajo e kishte krijuar për veten, ta këndonin bashkë. Kështu, babë e bijë u ngjitën për herë të parë në skenë me një duet të realizuar enkas për ta.

Pas performancës së ngrohtë, e gjithë salla u ngrit në këmbë, teksa emocionet përfshinë të dy artistët. Anna, mes lotësh, i tha të atit: “Je babi më i mirë në botë që mund të kërkonte çdo njeri! Të dua!”.

Po aq i prekur, Ardit Gjebrea i dha vajzës disa fjalë plot dashuri e bekime, siç vetëm një prind mund t’ia dedikoje.

“Këto janë momente që unë e di që ti nuk do t’i harrosh kurrë sepse është hera jote e parë dhe gjithë jetën, sa herë që kam qenë në skenë, një gjë vetëm më ka mbushur dhe më ka dhënë frymën, motivin. Ti nuk e di sa i lumtur jam unë kur eci rrugës dhe shikoj njerëz që më përshëndesin, pastaj thonë ‘ups, të kemi parë në televizor dhe më duket sikur të njohim’, u them pa problem, edhe unë ju njoh. Kjo dashuri që unë marr, uroj që të të shoqërojë edhe ty gjithë jetën, me dashurinë për skenën, me kokën ulur, me bekimin e Zotit, paç fat në jetë!”

Momenti i tyre u shndërrua në një nga çastet më të ndjera të mbrëmjes, duke bërë që rikthimi muzikor i Ardit Gjebreas të jetë një ndër më të veçantët e karrierës së tij.