Hailey Bieber ka zbuluar se dëshiron të zgjerojë familjen e saj, por ende nuk është e sigurt se sa fëmijë do të ketë në total. Në një intervistë për Interview Magazine, të publikuar më 14 prill, ajo u shpreh se dëshiron “më shumë se një fëmijë”, por po e merr gjithçka hap pas hapi.

Modelja dhe themeluesja e Rhode Skin, e cila tashmë është nënë e djalit 19-muajsh Jack Blues Bieber me bashkëshortin Justin Bieber, tregoi se mendimet e saj ndryshojnë shpesh: “Disa ditë dua dy fëmijë. Disa ditë dua pesë.”

Ajo shtoi se gjithmonë ka ëndërruar një familje të madhe: “Që e vogël kam dashur të jem e martuar dhe të kem fëmijë.” Për momentin, Hailey po shijon çdo moment me djalin e saj, duke përshkruar mëngjeset si ndër më të bukurat e ditës. Ajo tregon se zakonisht zgjohet rreth orës 7–8 dhe kalon kohë cilësore me të birin, i cili madje i bashkohet edhe gjatë përgatitjes së kafesë.

Sipas saj, pjesa më e bukur e mëmësisë është të shohësh rritjen dhe zhvillimin e fëmijës: “Ata rriten shumë shpejt dhe ndryshojnë vazhdimisht. Është sikur e përjeton jetën për herë të parë bashkë me ta.”

Megjithatë, ajo pranon se kjo eksperiencë sjell edhe ankth. Hailey u shpreh e shqetësuar për botën në të cilën po rritet djali i saj, duke e cilësuar atë si “të frikshme” dhe “të zymtë”. Pavarësisht kësaj, ajo thekson rëndësinë e besimit dhe një ambienti familjar të ngrohtë.

“Lutemi çdo natë bashkë. Për sa kohë ai rritet në një shtëpi plot dashuri dhe bukuri, kjo është gjithçka që mund të shpresoj,” përfundoi ajo.