Një libër i ri kushtuar jetës personale të Emmanuel dhe Brigitte Macron ka rikthyer në qarkullim episodin viral ku Zonja e Parë franceze shihej duke goditur lehtë presidentin, pamje që në atë kohë shkaktuan reagime të shumta në media dhe rrjete sociale.

Autori i librit “Një çift perfekt”, gazetari Florian Tardif i revistës Paris Match, pretendon se pas debatit mes çiftit qëndronte xhelozia. Sipas tij, Brigitte Macron ishte irrituar pasi kishte zbuluar në telefonin e presidentit mesazhe me aktoren iraniane Golshifteh Farahani.

Në intervistat promovuese të librit, Tardif shprehet se Macron kishte shkëmbyer prej muajsh biseda me aktoren dhe se në disa prej tyre ai e komplimentonte për pamjen e saj. Gazetari e cilëson raportin si “platonik”, por thotë se toni i mesazheve ishte mjaft personal për të krijuar tension në çift.

Sipas autorit, përplasja mes bashkëshortëve u përshkallëzua deri në momentin që më pas u bë publik përmes videos që qarkulloi gjerësisht online. Ai pretendon gjithashtu se informacionet janë konfirmuar nga disa burime të afërta me rrethin presidencial.

Në kohën kur pamjet u publikuan, stafi i Macron reagoi duke minimizuar situatën dhe duke e konsideruar atë një episod privat mes çiftit para një angazhimi zyrtar.

“Një moment krejt normal mes bashkëshortësh”, ishte qëndrimi i presidencës franceze, e cila tentoi të shuante spekulimet për probleme në marrëdhënien e tyre.

Edhe Emmanuel Macron komentoi më vonë mbi videon, duke pranuar se pamjet ishin reale, por duke kritikuar interpretimet që u bënë rreth tyre.

“Nuk e kuptoj si një moment i tillë u kthye në lajm botëror. Janë thënë shumë absurditete”, deklaroi presidenti francez.