Aktori i njohur ndërkombëtar Can Yaman ishte një nga figurat më të komentuara të kësaj fundjave në Sicily, ku u prit me entuziazëm të jashtëzakonshëm nga publiku.

Ylli i serialit të shumëpritur Sandokan ishte i ftuar special në festivalin Cannolo Fest, një event që zhvillohet në Piana degli Albanesi, e njohur ndryshe si Hora e Arbëreshëvet. Aktiviteti, i cili feston kulturën dhe traditat arbëreshe, mblodhi qindra pjesëmarrës dhe fansa që mbushën sheshin për të parë nga afër aktorin.

Gjatë mbrëmjes, Can Yaman u nderua me çmimin “Premio Hora Skanderbeg”, një vlerësim simbolik për kontributin dhe lidhjen e tij me kulturën shqiptare. Por momenti më i veçantë i eventit erdhi gjatë një bisede në skenë, ku aktori ndau një rrëfim personal që preku publikun.

I pyetur për lidhjen me këtë zonë, e cila përfaqëson një nga qendrat historike të komunitetit shqiptar në Itali, Yaman foli me emocion për figurën e babait të tij, duke e cilësuar si idhullin më të madh në jetë. Ai tregoi se historitë e fëmijërisë së të atit kanë ndikuar drejtpërdrejt në mënyrën si e percepton ai vetë identitetin dhe rrënjët e tij.

“Për mua babai im ka qenë gjithmonë idhulli im… ai më tregonte për fëmijërinë e tij, që e jetonte si një shqiptar, me shumë liri, duke luajtur dhe duke u rritur mes shoqërisë,” u shpreh aktori para publikut.

Ky rrëfim i sinqertë u prit me duartrokitje të gjata nga të pranishmit, duke krijuar një moment të veçantë që theksoi edhe një herë lidhjen e fortë të Can Yaman me origjinën dhe kulturën shqiptare.