Bebe Rexha ka reaguar publikisht lidhur me protestën e studentëve shqiptarë në Maqedoninë e Veriut, të cilët po kundërshtojnë ndalimin e zhvillimit të provimit të jurisprudencës në gjuhën shqipe.

Përmes një postimi në InstaStory, artistja shqiptare me famë botërore ndau një mesazh mbi rëndësinë e gjuhës shqipe dhe ruajtjen e identitetit kombëtar ndër vite.

“Gjuha jonë shqipe është e rrënjosur thellë në identitetin tonë. Për breza të tërë, ne luftuam për ta ruajtur dhe për ta mbajtur atë gjallë. Maqedonia e Veriut është një shtet multietnik i ndërtuar mbi bashkëjetesën dhe të drejtat e barabarta për të gjitha komunitetet e saj, ku gjuha shqipe është e njohur si gjuhë zyrtare. Studentët po protestojnë kundër ndalimit të dhënies së provimit të jurisprudencës në gjuhën shqipe këtë të hënë që vjen.”, shkroi ajo.

Në reagimin e saj, Bebe Rexha theksoi se Maqedonia e Veriut është një shtet multietnik ku shqipja njihet si gjuhë bashkëzyrtare, duke shtuar se studentët shqiptarë duhet të kenë të njëjtat të drejta dhe mundësi si çdo qytetar tjetër.

Reagimi i artistes vjen në kohën kur studentët shqiptarë kanë paralajmëruar protesta për të kërkuar zbatimin në praktikë të së drejtës për dhënien e provimeve në gjuhën amtare.