Të jetosh gjatë nuk mjafton: rëndësi ka të plakesh në shëndet të mirë, shkruan my-personaltrainer.it.

Të arrish moshën 90 apo 100 vjeç nuk është më objektivi i vetëm i mjekësisë moderne.

Ekspertët theksojnë se rëndësi ka që vitet e jetës të kalohen me sa më shumë autonomi, energji dhe cilësi jete, duke shmangur sa të jetë e mundur sëmundjet dhe humbjen e pavarësisë.

Sipas studimeve europiane, shumë njerëz kalojnë vitet e fundit të jetës me probleme kronike si vështirësi në lëvizje, lodhje të vazhdueshme, humbje kujtese apo izolim social.

Për këtë arsye, mjekët këshillojnë që pas moshës 50 vjeç të mos neglizhohen shenja si mungesa e frymëmarrjes edhe gjatë ecjes, dobësia muskulore, dhimbjet e vazhdueshme të kyçeve, pagjumësia apo problemet me kujtesën.

Specialistët nënvizojnë se gjenetika ndikon në jetëgjatësi, por nuk është faktori i vetëm.

Stili i jetesës luan rol vendimtar në mënyrën se si plaket organizmi. Popullsitë më jetëgjata në botë kanë disa zakone të përbashkëta: lëvizje të përditshme, ushqim të thjeshtë dhe pak të përpunuar, konsum të lartë të perimeve dhe bishtajoreve, marrëdhënie të forta sociale dhe nivele më të ulëta stresi.

Ekspertët rekomandojnë gjithashtu kontrolle të rregullta për tensionin, gliceminë dhe kolesterolin, si dhe kontroll të shikimit, dëgjimit dhe funksioneve njohëse pas moshës 65 vjeç.

Aktiviteti fizik i moderuar, ecja e përditshme dhe ushtrimet për forcimin e muskujve konsiderohen ndër mënyrat më efektive për të ruajtur shëndetin e zemrës, trurit dhe kockave.

Sipas mjekëve, sekreti i një jete të gjatë nuk lidhet me ndryshime ekstreme, por me zakone të vogla dhe të qëndrueshme që ndihmojnë trupin dhe mendjen të mbeten aktive për sa më shumë vite.