Kim Kardashian ka vendosur të hapë garderobën e saj luksoze për fansat, duke nxjerrë në shitje qindra artikuj të njohur në platformën “Kardashian Kloset”.

Ylli i famshëm televiziv po shet afro 300 veshje dhe aksesorë nga markat më të njohura të modës, mes tyre kombinime që i ka përdorur në evente prestigjioze dhe në serialin e saj “All’s Fair”. Sipas “Daily Mail”, shumë prej artikujve janë ulur ndjeshëm në çmim, duke tërhequr menjëherë vëmendjen e adhuruesve të modës.

Një nga pjesët më të komentuara është kostumi prej lëkure “Prada”, të cilin Kim Kardashian e kishte veshur gjatë Javës së Modës në Milano në vitin 2022. Fillimisht i listuar për rreth 7,900 euro, ai tashmë shitet për afro 5,900 euro. Ndërkohë, një fustan vintage “Jean Paul Gaultier” është ulur nga rreth 7,900 euro në afërsisht 3,900 euro.

Në koleksion përfshihen gjithashtu çanta, taka dhe veshje të rralla nga “Chanel”, “Dior” dhe “John Galliano”. Artikulli më i shtrenjtë mbetet një set arkivor “John Galliano”, me vlerë rreth 52 mijë euro.

Kim Kardashian kishte paralajmëruar prej muajsh se do të nxirrte në ankand pjesë nga garderoba e saj me vlerë miliona euro, ndërsa tani fansat kanë mundësinë të blejnë disa prej veshjeve më ikonike të saj.