Hannah Murray ka ndarë një nga periudhat më të vështira të jetës së saj, duke folur hapur për krizën psikotike që përjetoi pasi u përfshi në një grup të lidhur me praktika të mirëqenies shpirtërore. Aktorja britanike, e njohur për rolin e Gilly-t në Game of Thrones, tregoi se kjo eksperiencë ndikoi drejtpërdrejt në shëndetin e saj mendor dhe çoi më vonë në diagnostikimin me çrregullim bipolar.

Në një intervistë të fundit, Murray rrëfeu se gjithçka nisi gjatë periudhës së xhirimeve të filmit “Detroit” në vitin 2017, kur u njoh me një person që prezantohej si “shërues energjie”.

Fillimisht, ajo e pa këtë eksperiencë si një mënyrë për të gjetur qetësi dhe balancë emocionale, por me kalimin e kohës u përfshi gjithnjë e më shumë në kurse dhe rituale të kushtueshme që lidhen me spiritualitetin dhe “shërimin energjetik”.

Aktorja shpjegoi se besimi ndaj njerëzve që e prezantuan me këtë grup bëri që ajo të mos i vinte në dyshim praktikat dhe ndikimin e tyre psikologjik. Sipas saj, situata arriti kulmin kur filloi të përjetonte mendime maniake dhe humbje të kontaktit me realitetin.

Murray kujtoi se gjatë një aktiviteti në Londër pësoi një krizë të rëndë psikologjike, ku mendonte se kishte një “mision të jashtëzakonshëm” dhe se mund të ndryshonte botën. Ajo tregoi gjithashtu se anëtarët e grupit reaguan ndaj gjendjes së saj me rituale dhe sjellje që sot i konsideron shqetësuese.

Përmes librit të saj autobiografik, aktorja synon të tregojë se askush nuk është imun ndaj manipulimit psikologjik dhe se problemet e shëndetit mendor mund të prekin këdo, pavarësisht edukimit apo statusit social.