Një nga vilat në pronësi të tenorit të njohur italian Andrea Bocelli, e vendosur në zonën ekskluzive bregdetare të Forte dei Marmi në Toskanë, është grabitur nga persona ende të paidentifikuar. Sipas mediave italiane, autorët kanë marrë bizhuteri, ora luksi, çanta të markave të njohura dhe para në dorë, ndërsa dëmi i përllogaritur arrin në rreth 500 mijë euro.

Në momentin e grabitjes, vila nuk ishte e banuar nga familja Bocelli, por ishte dhënë me qira për një familje amerikane që po kalonte pushimet. Sipas hetimeve paraprake, hajdutët kanë përfituar nga mungesa e përkohshme e banorëve gjatë mbrëmjes për të hyrë në banesë dhe për të marrë sende me vlerë të lartë, ndërsa ngjarja dyshohet të ketë ndodhur mes orës 21:00 dhe mesnatës. Karabinierët po analizojnë pamjet e kamerave të sigurisë, ndërsa një nga pistat e hetimit është se autorët mund të kenë studiuar më herët lëvizjet e banorëve, megjithëse kjo nuk është konfirmuar zyrtarisht.

Nuk është hera e parë që pronat e Andrea Bocellit bien në shënjestër të grabitësve. Në vitin 2018 një tentativë grabitjeje u pengua nga rojet private të sigurisë, ndërsa në vitin 2022 një tjetër vilë e tenorit u vu sërish në shënjestër. Ngjarja vjen në një kohë kur zona e Versilias po përballet me një rritje të rasteve të vjedhjeve të sendeve luksoze, me disa grabitje të bujshme të raportuara gjatë muajve të fundit.