Cristiano Ronaldo dhe Georgina Rodríguez mund të jenë shumë pranë një prej momenteve më të rëndësishme të jetës së tyre. Mediat portugeze raportojnë se çifti pritet të kurorëzojë lidhjen e tyre disavjeçare me martesë gjatë kësaj jave. Sipas zërave të fundit, ceremonia madhështore mund të zhvillohet mes të premtes dhe të shtunës në një nga zonat më elegante pranë Lisbonës. Edhe pse deri tani nuk ka një konfirmim zyrtar nga çifti, lajmi ka pushtuar mediat rozë dhe ato portugeze.

Ronaldo kishte treguar më herët në një intervistë për Piers Morgan se dasma do të zhvillohej pas përfundimit të Kupës së Botës, por kishte preferuar të mos zbulonte detaje rreth datës apo vendndodhjes.

Fillimisht ishte përfolur se ceremonia do të mbahej në Madeira, vendlindjen e yllit të futbollit. Megjithatë, në ditët e fundit vëmendja është zhvendosur drejt Sintrës, ku përflitet se vendi i mundshëm i dasmës mund të jetë vila historike Quinta da Regaleira, një nga monumentet më të famshme të Portugalisë.

Dyshimet janë shtuar pasi institucioni që administron këtë monument nuk ka dhënë një mohim të drejtpërdrejtë për këto raportime, duke zgjedhur të mos komentojë mbi spekulimet. Cristiano Ronaldo dhe Georgina Rodríguez janë bashkë prej rreth një dekade dhe kanë ndërtuar një familje të madhe së bashku. Çifti kujdeset për pesë fëmijë, ndërsa fejesën e tyre e bënë publike në gusht të vitit 2025.

Nëse lajmi konfirmohet, kjo do të jetë një nga dasmat më të komentuara të botës së sportit dhe showbiz-it.