Chiara Ferragni nuk e ka kaluar në heshtje një koment kritik për jetën e saj si nënë. Sipërmarrësja italiane ka reaguar publikisht pasi një ndjekës e pyeti nëse gjen kohë të kujdeset për fëmijët e saj, duke qenë se udhëton shpesh dhe shfaqet në evente të ndryshme.

“Herë pas here bën edhe rolin e nënës? Je gjithmonë nëpër udhëtime”, i shkroi ndjekësi gjatë një sesioni pyetje-përgjigje në Instagram.

Përgjigjja e Chiara-s ishte e menjëhershme dhe e drejtpërdrejtë.

“Seriozisht? Unë jam gjithmonë nënë, sepse jam nëna e tyre”, u shpreh ajo, duke kundërshtuar idenë se angazhimet profesionale dhe udhëtimet e shpeshta e bëjnë më pak të pranishme në jetën e fëmijëve të saj, Leone dhe Vittoria.

Ajo shpjegoi se, kur nuk është e angazhuar me punën, kalon kohën me fëmijët, ndërsa zbuloi se gjatë javëve të fundit ata e kishin shoqëruar edhe në Madrid dhe Paris gjatë fundjavave. Megjithatë, ajo që e shqetëson më shumë Ferragni-n nuk është vetëm komenti për jetën e saj personale, por mënyra se si shoqëria vazhdon t’i gjykojë gratë që përpiqen të ndërthurin karrierën me mëmësinë.

“A mund të ndalojmë së gjykuari nënat? Është vërtet diçka e prapambetur dhe absurde”, shkroi sipërmarrësja, duke rikthyer në vëmendje standardet e dyfishta me të cilat përballen shpesh gratë që punojnë dhe kanë fëmijë.

Ndërkohë, pas ndarjes nga reperi Fedez, Chiara duket se po përjeton një periudhë të re edhe në jetën sentimentale. Ajo është në një lidhje me José Hernandez, një menaxher kolumbian, me të cilin u lidh dhjetorin e kaluar.

Gjatë verës, sipërmarrësja udhëtoi drejt Kolumbisë për të takuar familjen e partnerit, ndërsa kaloi gjithashtu disa ditë në Peru. Përmes rrjeteve sociale, ajo ndau momente nga ky udhëtim dhe falënderoi familjarët e José-s për mikpritjen dhe ngrohtësinë që i kishin treguar.

Nga ana tjetër, në shtator, disa fotografi të saj dhe veshjet më të gjera nxitën aludimet për një shtatzëni të mundshme. Megjithatë, këto zëra u mohuan nga persona pranë saj.