Ndërsa ditët shkurtohen dhe garderoba kalon drejt nuancave më të ngrohta, një ngjyrë rikthehet për të marrë vëmendjen që meriton: bordo. E thellë, elegante dhe me një intensitet që i jep karakter çdo kombinimi, ajo është një nga zgjedhjet më të bukura të sezonit. Pas dominimit të kafesë në veshjet e muajve të fundit, moda po i drejtohet nuancave të verës së kuqe, duke u dhënë kombinimeve të përditshme një pamje më të pasur dhe më interesante.

Edhe Chanel e ka përfshirë këtë ngjyrë në koleksionin e ri, duke e sjellë në veshje dhe aksesorë. E lidhur prej kohësh me astarin e çantave ikonike të shtëpisë franceze, bordo del këtë sezon në plan të parë, duke rifreskuar kodet klasike të markës pa humbur elegancën që e karakterizon.

Ajo që e bën bordonë kaq tërheqëse është ekuilibri mes ngrohtësisë dhe sensualitetit. Më e butë se e zeza, por më e thellë se kafeja, ajo funksionon si në veshjet e përditshme, ashtu edhe në kombinimet për mbrëmje. Një triko bordo me xhinse krijon një pamje të thjeshtë, por të kuruar, ndërsa një fustan ose fund lëkure në këtë nuancë i jep veshjes më shumë karakter.

Aksesorët janë mënyra më e lehtë për ta provuar këtë trend. Një çantë e strukturuar, një palë çizme të larta, doreza ose një rrip në ngjyrë bordo mund të ndryshojnë tërësisht pamjen e një kombinimi. Mjafton një çantë bordo me xhinse dhe xhaketë për t’i dhënë veshjes një tjetër dimension, ose një palë çizme në këtë nuancë për ta bërë më interesant një fustan minimalist.

Sa i përket kombinimeve, bordo me të zezën mbetet një nga zgjedhjet më elegante të sezonit. E zeza thekson thellësinë e bordosë, ndërsa kjo e fundit i shton ngrohtësi pamjes. Një triko bordo me pantallona të zeza, një fund lëkure me një bluzë të zezë ose një çantë bordo mbi një kombinim total black janë ide që funksionojnë pa shumë përpjekje.

Për ato që preferojnë të vishen me të njëjtën ngjyrë nga koka te këmbët, kombinimet monokromatike janë një tjetër mënyrë për ta përqafuar trendin. Sekreti është të luani me teksturat: një triko e butë me një fund lëkure, një xhaketë leshi mbi një fustan të rrjedhshëm ose materiale mat të kombinuara me sipërfaqe të shkëlqyeshme i japin pamjes thellësi dhe lëvizje.

Bordo nuk është thjesht një ngjyrë që shfaqet për pak javë në pasarelat e modës. Ajo ka elegancën e një nuance klasike dhe fleksibilitetin për t’u përshtatur me stile të ndryshme, nga kombinimet minimaliste deri te veshjet më të guximshme. Këtë vjeshtë, mund ta vishni në një pjesë të vetme që bie në sy ose ta bëni elementin kryesor të garderobës suaj.