Këngëtarja kolumbiane Shakira ka fituar betejën e saj ligjore me autoritetet tatimore spanjolle, pasi Gjykata e Lartë në Spanjë vendosi ta lirojë nga akuzat për evazion fiskal dhe të rrëzojë gjobën prej rreth 55 milionë eurosh të vendosur në vitin 2021.

Sipas vendimit gjyqësor, gjykata urdhëron gjithashtu që Thesari spanjoll t’i kthejë këngëtares mbi 60 milionë euro, shumë që përfshin taksa të paguara, gjoba dhe interesa.

Vendimi vjen pas ankesës së paraqitur nga vetë artistja, e cila kundërshtoi pretendimet e autoriteteve se ajo kishte fshehur të ardhura dhe duhej të konsiderohej rezidente tatimore në Spanjë gjatë periudhës në fjalë.

Gjykata konstatoi se nuk kishte prova të mjaftueshme për të vërtetuar se Spanja ishte qendra e jetës së saj ekonomike dhe personale në atë kohë, duke marrë parasysh edhe angazhimet e saj të shumta ndërkombëtare dhe turnetë botërore.

Rasti është një nga disa çështje të profilit të lartë të ndjekura nga autoritetet tatimore spanjolle ndaj figurave të njohura ndërkombëtare në vitet e fundit.