Me një mesazh falënderimi për këdo që i tha fjalë zemre për t’ia lehtësuar sa më shumë dhimbjen e madhe Agron Llakaj, foli sot disa ditë pas humbjes së bashkëshortes. Aktori i njohur i humorit thotë se e ka ndjerë dashurinë e çdo kujt por dhimbjen për humbjen e Kostandinës, nuk e lehtësoi asgjë. Në fund të këtij vidoe-mesazhi, Llakaj këshillon çdo kënd që ta vlerësojë shëndetin si pasurinë më të madhe.

“Faleminderit për cdo fjalë zemre për mua dhe familjen tim. Gëzimet dhe hidhërimet ndahen me njerëzit, të njohur e të panjohur. Dashuria e madhe e njerëzve na bëri që këto ditë të vështira t’i kalojmë më lehtë. Dhimbja që Kostandina la mbrapa, është shumë e madhe. Përgjatë dy viteve Kostandina luftoi me sëmundjen. Unë nuk e ndala punën as në ato ditë. Ishte e vështirë të bëje humor, kur në zemër kishe një thikë. Motivi im ishte Kostandina. Ajo që Kostandina la pas, uroj që fëmijët e mi ta trashëgojnë. Dashurinë e madhe njerëzore dhe respektin njerëzor mbi gjithçka.

Pasuria më e madhe që mund të kemi në jetë është shëndeti. Para shëndetit, jetës dhe njerëzve të dashur të familjes, çdo gjë tjetër është shumë e vogël!”, thotë Llakaj