Më shumë se 50 njerëz kanë humbur jetën në Indi gjatë tre ditëve të fundit, si pasojë e temperaturave të larta që kanë përfshirë vendin. Rreth 33 persona vdiqën në shtetin verior të Uttar Pradesh gjatë fundjavës për shkak të të nxehtit. Në shtetin Odisha (Orissa) humbën jetën rreth 20 të tjetër, citon BBC.

Shumë prej këtyre vdekjeve u raportuan më 1 qershor ndërsa India votoi për zgjedhjet e saj të përgjithshme. Rezultatet e zgjedhjeve pritet të shpallen më 4 qershor. Çdo pesë vjet, India mban zgjedhjet e saj të përgjithshme në muajt e verës, prill dhe maj. Por këtë vit temperaturat kanë qenë rekord, ku vendi po përjeton valë të nxehta të shpeshta, më intensive dhe më të gjata. Ministria e shëndetësisë thotë se ka pasur të paktën 56 vdekje të konfirmuara nga temperaturat ekstreme gjatë periudhës 1 mars deri më 30 maj. Mes viktimave kanë qenë edhe policë vullnetarë, roje sigurimi, staf sanitar dhe zyrtarë të votimit.

Në Odisha, autoritetet raportuan 99 vdekje në 72 orët e fundit. Po ashtu raste të ngjashme janë raportuar edhe në shtet si Bihar, Madhya Pradesh dhe Jharkhand. Qendra Kombëtare e Indisë për Kontrollin e Sëmundjeve i konsideron këto temperatura si kërcënuese për vdekje që do të rrisin shkallës e vdekshmërisë me 40-64% . Nxehtësia në Indinë veriore dhe qendrore dhe pjesë të perëndimit ka qenë e pandërprerë për dy javët e fundit, me temperaturat maksimale që lëvizin rreth 45-46C për ditë të tëra, duke arritur deri në 50C në disa zona. Megjithatë, departamenti i motit thotë se temperaturat ka të ngjarë të bien në ditët në vijim.