Ato janë tani kudo: nga kuzhina dhe banja te supermarketi dhe lodrat e fëmijëve. Plastika është pjesë e jetës së përditshme dhe merr forma të ndryshme, ndonjëherë të rrezikshme për shëndetin. Në përpjekjen e përgjithshme kërkimore që është bërë mbi efektin e mikroplastikës në shëndet dhe plastikës në përgjithësi në mjedis, një studim më i ri nga Departamenti i Mjekësisë i Universitetit Privat të Danubit në Austri, këtë herë i bën shishet plastike fajtore për rritjen e presionit të gjakut.

Në hulumtimin e titulluar “Dëshmia e parë e ndikimit të mundshëm të shmangies së konsumimit të lëngjeve nga shishet e pijeve plastike dhe qelqi mbi presionin e gjakut te vullnetarët e shëndetshëm”, theksohet efekti i dëmshëm i përdorimit të shisheve plastike, si dhe qelqi.

Sipas hulumtimit, të publikuar në Microplastics, mikroplastika nga shishet e ujit mund të hyjë në qarkullimin e gjakut duke çuar në rritjen e niveleve të presionit të gjakut. Akoma më alarmante është konstatimi se këto copa të vogla plastike janë gjetur edhe në shishe qelqi. Ndërsa studimi përparonte, studiuesit vunë re një rënie të presionit të gjakut kur pjesëmarrësit këmbyen gotën ose shishen plastike për të pirë ujë të rubinetit.

Gjatë studimit, studiuesit morë n tetë vullnetarë që pinin ujë nga rubineti, duke shmangur çdo konsumim të lëngjeve nga shishet plastike ose qelqi. Rezultatet ishin mjaft mbresëlënëse, duke treguar një ulje të ndjeshme të presionit diastolik të gjakut pas dy javësh.

Presioni i lartë i gjakut është një nga kontribuuesit kryesorë të sëmundjeve të zemrës dhe rezultatet e studimit ngrenë pyetje në lidhje me kërcënimet indirekte, por serioze për shëndetin: “Pas hulumtimeve të gjera arritëm në përfundimin se pijet e paketuara në shishe plastike duhet të shmangen.”, paralajmërojnë studiuesit.

Siç theksojnë ata, reduktimi i përdorimit të plastikës mund të ulë potencialisht presionin e gjakut duke reduktuar numrin e grimcave plastike në qarkullimin e gjakut. “Ndryshimet që kemi vërejtur në presionin e gjakut sugjerojnë se reduktimi i marrjes së grimcave plastike mund të zvogëlojë rrezikun kardiovaskular,” vunë në dukje studiuesit.

Një kërcënim i përhapur

Mikroplastikat janë fragmente të vogla plastike që zakonisht rezultojnë nga prishja e plastikës për shkak të ekspozimit ndaj rrezatimit UV ose nga gërryerja natyrale. Ato janë identifikuar më parë nga studimet shkencore në pështymë, indet e zemrës, mëlçinë, veshkat, madje edhe placentë. Studime të shumta kanë raportuar nivele të larta të mikroplastikës në ujin në shishe. Ky grup në rritje i informacionit kërkimor sugjeron gjithashtu se mikroplastika mund të prishë funksionet endokrine, të shkaktojë inflamacion dhe të shkaktojë stres oksidativ. Këto reagime shkaktojnë një sërë procesesh biologjike që mund të përkeqësojnë kushtet ekzistuese apo edhe të shkaktojnë probleme të reja shëndetësore, gjë që nxjerr në pah nevojën urgjente për kërkime të mëtejshme mbi efektet në fiziologjinë e njeriut.