Kristin Cabot, një nga gratë më të përfolura gjatë korrikut të kaluar, ka reaguar për herë të parë pas skandalit të njohur si “kiss cam”, i cili, sipas saj, i shkatërroi jetën. Në vitin 2025, Cabot, ish-drejtoreshë e Burimeve Njerëzore në Astronomer, u pa duke përqafuar ish-CEO-n e kompanisë, Andy Byron, gjatë një koncerti të Coldplay. Videoja u bë virale dhe nxiti spekulime për një lidhje jashtëmartesore, duke krijuar një rrjet memesh, urrejtjesh dhe kërcënimesh për jetën e saj.

Për herë të parë, Cabot ka pranuar të flasë publikisht për incidentin në podcastin e Oprah Winfrey, duke shpjeguar se si ky moment ndikoi jo vetëm në jetën profesionale, por edhe në atë personale. Ajo thekson se videoja u pasqyrua ndryshe nga realiteti. “Kishte një mungesë të madhe të ndershmërisë dhe integritetit. Ai nuk ishte personi që ishte hequr me mua dhe gënjeshtra nuk është diçka që mund ta pranoj.”

Cabot tregoi se në atë periudhë ajo ishte në proces divorci me bashkëshortin e saj dhe se marrëdhënia me Byron ishte thjesht profesionale. Ai po ashtu i kishte treguar se ishte në proces divorci, dhe pikërisht kjo situatë e përbashkët solli pëlqimin midis tyre. Sipas saj, ishte ajo që e ftoi Byron në koncert, si diçka që erdhi natyrshëm dhe po atë natë për herë të parë patën kontakt fizik. Ajo shtoi se ishte vajza e saj që e kishte lajmëruar se edhe ish-bashkëshorti ndodhej po në të njëjtin koncert atë natë.

Por ajo që erdhi pas videos ishte diçka që nuk e kishte imagjinuar kurrë dhe tronditi jo vetëm atë, por edhe jetën e fëmijëve të saj. Cabot, e cila më parë tha se incidenti i përmbysi jetën, tregoi Winfrey-t se nuk do të ishte e drejtë që ajo të thoshte hapur se ndjente që Byron e kishte gënjyer, duke pasur parasysh se si ishte të kishte jetën e saj private në qendër të vëmendjes, por tha se kishte ndërprerë marrëdhënien me ish-shefin e saj që prej vjeshtës së kaluar.

“Dua të jem shumë e kujdesshme, sepse bota foli për mua dhe në emrin tim, dhe nuk dua t’ia bëj këtë dikujt tjetër dhe familjes së tij,” i tha ajo Winfrey-t.

Ajo theksoi se është ndjerë e vetme përballë situatës, duke kritikuar heshtjen e Byron. “Isha unë ajo që u sulmova, ndërsa ai qëndroi në heshtje.”

Cabot gjithashtu theksoi se reagimi ndaj saj ishte i padrejtë dhe shumë i diferencuar krahasuar me Byron, i cili nuk u kritikua po aq dhe vazhdoi me ofertat profesionale. Ajo tregoi se paparacë dhe të huaj hynin në pronën e saj, brohorisnin dhe ndenjën jashtë dritareve të shtëpisë, duke e detyruar të mbrohej për fëmijët dhe jetën e saj personale.

53-vjeçarja kritikoi gjithashtu mënyrën se si rrjetet sociale përfitojnë nga momentet virale: “Sa më shumë dhimbje të ketë një person si unë, aq më shumë para fitojnë ata. Ne nuk e kuptojmë që kur klikojmë dhe shpërndajmë, po kontribuojmë në algoritme që ushqejnë dhimbjen dhe përfitimet financiare të tyre.”

Ajo bëri thirrje për më shumë përgjegjësi dhe empati në mënyrën se si trajtohen individët që kapen në situata virale.

Në fund, nuk kurseu as emra të njohur në kritikën e saj, si Gwyneth Paltrow, ish-bashkëshorten e Chris Martin, për pjesëmarrjen e saj në një reklamë të Astronomer pas skandalit, duke thënë se kjo e shtoi ndjenjën e poshtërimit. “Jam e zemëruar se si gratë po trajtojnë gratë e tjera. Pse gëzojmë kur shohim të tjerët të vuajnë?”

Cabot pranon se bëri një gabim në atë moment, por thekson se dënimi publik ishte i tepruar: “E pranoj vendimin tim të gabuar, por kam paguar një çmim të paimagjinueshëm. Një video e shkurtër nuk mund të përcaktojë identitetin e një personi.”

Ajo u shpreh se nuk do të qëndrojë më në heshtje dhe synon të përdorë përvojën e saj për të edukuar publikun mbi pasojat reale që mund të kenë fenomenet virale dhe gjykimet e nxituara në internet, duke kërkuar më shumë empati dhe përgjegjësi nga të gjithë.