Stili i Lady Diana-s vazhdon të rikthehet dhe këtë herë, janë mbesat e saj që risjellin një prej veshjeve më ikonike të saj. Disa ditë më parë, Lady Amelia dhe Lady Eliza Spencer, mbesat binjake të Diana-s, u shfaqën në Cheltenham Festival me veshje që nuk kaluan pa u vënë re dhe jo pa arsye.

Motrat zgjodhën kostume tweed, ndoshta si një homazh ndaj një prej pamjeve më të famshme të Diana-s (Tweed – pëlhurë leshi e njohur për teksturën pak të ashpër dhe ngjyrat e përziera. Me origjinë nga Skocia, është përdorur tradicionalisht për veshje rezistente ndaj motit, si xhaketa, pallto dhe kapele, dhe karakterizohet nga motivet klasike si kuadratet dhe vijëzimet).

Në vitin 1981, gjatë muajit të mjaltit me Charles, Diana u fotografua në Balmoral Castle me një kostum tweed me fund, një look që u bë menjëherë trend.

I dizenjuar nga Bill Pashley, ky outfit u frymëzua nga estetika tradicionale britanike dhe u mendua posaçërisht për qëndrimin e saj në Skoci. Madje, thuhet se Diana kishte dy versione të kostumit: një prej tyre pak më i lirshëm, për të qenë më komode gjatë shëtitjeve në natyrë.

Amelia dhe Eliza e rikthyen këtë estetikë në një version më bashkëkohor. Eliza zgjodhi një kostum në ngjyrë kafe, me pantallona dhe jelek, të kombinuar me një pallto të njëjtë. Amelia veshi një set në nuancë jeshile të hapur, të kombinuar me këmishë blu dhe kravatë.

“Na vjen natyrshëm [të vishemi njësoj] sepse kemi shije shumë të ngjashme,” ka thënë Amelia në një intervistë. “Shpesh përfundojmë duke zgjedhur të njëjtat veshje.”