Pas një shkëputjeje të gjatë nga televizioni për t’iu përkushtuar familjes, Neslihan Atagül ka konfirmuar se do të rikthehet në ekran në sezonin e ri televiziv.

Aktorja e njohur turke, e cila u bë nënë për herë të parë më 6 mars 2025 me lindjen e djalit të saj Aziz, ka vendosur t’i rikthehet aktrimit pas disa vitesh larg projekteve të reja. Roli i saj i fundit ishte në serialin “Gecenin Ucunda” (Në fund të natës).

Në një deklaratë të fundit, Atagül u shpreh se mezi pret të rikthehet në atmosferën e sheshxhirimeve dhe se përgatitjet për projektin e ri kanë nisur.

“Këtë sezon do të jem në ekran. Jam shumë e emocionuar. Aktualisht jemi në fazën e përgatitjeve. Partneri im në serial ende nuk është përzgjedhur dhe për momentin nuk mund të zbuloj më shumë detaje,” tha aktorja.

E martuar me aktorin Kadir Doğulu, Neslihan tregoi se ka menduar edhe për mënyrën se si do ta balancojë punën me rolin e nënës. Ajo zbuloi se djali i saj i vogël do ta shoqërojë herë pas here gjatë xhirimeve.

“Edhe djali im do të vijë në sheshxhirim. Jemi gati të jetojmë në karavan,” u shpreh ajo me humor.

Megjithëse ende nuk është bërë publik emri i serialit të ri apo platforma ku do të transmetohet, rikthimi i Neslihan Atagül konsiderohet një nga më të shumëpriturit nga fansat e saj.