Gazetarja e njohur Mira Kazhani ka ndarë me ndjekësit e saj një prej rrëfimeve më të vështira dhe më të ndjeshme të jetës. Përmes podcastit të saj, ajo ka bërë publik faktin se prej një viti është duke luftuar me kancerin e gjirit.

Mes emocioneve dhe lotëve, Kazhani tha se diagnoza i erdhi si një goditje e papritur më 2 nëntor 2024, duke e përshkruar atë ditë si “dimrin e jetës” së saj.

“U diagnostikova me kancer në gji dhe që prej asaj dite gjithçka ndryshoi përgjithmonë. Në podcaste keni parë vetëm gjysmën time, ndërsa pjesa tjetër zhvillohej në një betejë të gjatë me sëmundjen. Në atë kohë zgjodha të hesht, të përqëndrohem te shërimi im dhe të mos bëhem lajm në rrjet. Sot, ndihem mirënjohëse ndaj kolegëve të mi që e mësuan situatën time e që nuk e shpërndanë lajm, duke më sjellë qetësi mua e që nuk sollën shqetësim tek prindërit e mi që nuk e dinin se çfarë po kalonte fëmija i tyre, tani e dinë se çfarë kisha.”, shprehet gazetarja.

Ajo rrëfeu se e ka gjetur forcën duke dëgjuar histori të grave të tjera që kanë kaluar nëpër të njëjtin kalvar spitalesh, ndërsa theksoi se pavarësisht se kanceri i saj u zbulua herët, sëmundja mbetet një makth i rëndë për çdo grua. “Nuk ka kancer të lehtë, është makth. Edhe kur diagnostikohet në fazat e para, është një plagë e madhe në shpirt e trup”, u shpreh ajo.

Në librin e saj “Një ditë tjetër”, Kazhani ka dokumentuar detajet e kësaj periudhe të vështirë, duke ndarë jo vetëm dhimbjen dhe frikën, por edhe shpresën dhe guximin që e kanë shoqëruar gjatë gjithë rrugëtimit.

“Gjithmonë kam besuar tek rrëfimi. Ky është podcasti më i vështirë i jetës sime, ndaj për të më bërë pyetje sot kam ulur përballë një shoqe jete”, shtoi ajo.